Questions les plus fréquemment posées
Si vous le souhaitez, vous pouvez filtrer par expertise les questions-réponses affichées, à l’aide des boutons sur le côté gauche.
Ma puru si tratta da veru di una divisioni, ghjuridicamenti custitutiva di luttisciamentu. Venda una parcedda da custruiscia asistenti à mezu à d’altri chì li sò appiccicati hè un’òpara cunsidarata quant’è un luttisciamentu, chì si travadda quì in riguardu à ciò ch’omu chjama l’unità fundaria. L’unità fundaria, hè l’insemi di i parceddi appiccicati chì appartènani à un listessu prupietariu. Tandu, da chì ci hè un staccamentu di un pezzu di un’unità fundaria, ch’eddu sighji stu pezzu d’una parcedda asistenti o nò, c’hè divisioni fundaria. Tandu, bisognu à raghjunà quant’è si i lìmiti interni di l’insemi di i parceddi furmendu l’unità fundaria erini divintati invisìbuli.
Oghji sempri, si senti à spessu issa dumanda. Eppuru, ùn s’hè mai da veru sposta in quiddi tàrmini, è ùn si poni mancu più da u 2012. À l’èpica, un luttisciamentu pudia essa quant’è un accunciamentu d’una certa impurtanza. Oghji ghjornu, da i primi lotti à custruiscia, l’òpara custituiscia ghjuridicamenti un luttisciamentu . Ma puru, quidda ùn inghjena micca dimarchji pisivi è custosi.
Chjaramenti, asistani oghji dui sorti di luttisciamentu : u luttisciamentu dettu dichjaratu è u luttisciamentu dettu auturizatu. In u primu casu, qualsìasi u nùmaru di lotti, i tarreni sò vinduti dighjà viabilizati : t’ani par ognunu un accessu indipindenti è una pussibilità di raccordu autunomu à i reti d’acqua currenti, d’elettricità è d‘arisanamenti cullettivu (chjamatu dinò « tuttu in cundutu ») s’eddu asista.
In tantu si tratta di un luttisciamentu chì ùn abbisogna micca travaddi in generali. Pà un prughjettu sìmulu, un cartulaghju simplificatu chjamatu dichjarazioni in anticipiu devi essa dipusitatu in merria.
In u sicondu casu, u prughjettu privedi a criazioni o l’accunciamentu di vii, spazii o equipamenti cumuni (com’è una via sirvendu à parechji lotti, o una stazioni di epurazioni cullettiva). Si devi tandu fà una dumanda di permessu d’accunciamentu. Hè un cartulaghju beddu più cumplessu, chì in a cuncipitura di u quali l’architettu DPLG devi in generali intarvena. Di più, in a maiò parti di i casi, i lotti ùn pudarani micca essa vinduti chè solu quandu sarani rializati i vii è i reti chì a disèrvini.
Da nutà in fini chì un luttisciamentu privistu in una zona prutetta devi fà l’ughjettu di un permessu d’accunciamentu, qualsìasi à so forma.
RFU è Géofoncier indèttani un sistema cintrali almanachendu è cartugrafichendu i travaddi fundarii fatti da i giumetri-sperti. Par indettu, quandu femi una divisioni fundaria o una limitera, t’avemi l’òblicu d’arrighjistrà in quidda basa di dati i ducumenti assuciati (pianu di divisioni, pianu è prucessu verbali di limitera, etc…) è u tracciatu di i cunfini limitati. Tandu, ogni parsona chì si voli sapè se un giumetru-spertu hè intarvinutu nantu una parcedda data si pò infurmà nantu à u purteddu geofoncier.fr.
A limitera cuntradittoria cumpletta di un lottu natu di a divisioni rileva à li volti di un òblicu legali. Hè cusì par indettu pà i lotti di luttisciamenti.
Quandu a limitera cumpletta ùn hè ublicatoria, a limitera cuntradittoria di i cunfini di nova lìmita hè in a maiò parti di i casi imposta da i nosci direttivi intantu chè rèculi di l’arti. Quant’è par ogni travaddi di giumetru-spertu, l’ughjettivu hè di securizà l’òpara, da privena ogni lita. Di fattu, a cunfina di una nova lìmita s’arremba à più spessu nantu à una lìmita vicinanti, è u prupietariu di a parcedda cuncirnata devi essa chersu.
Qualchì casi rari sò fora di quiddu òblicu, quant’è a divisioni senza matirialisazioni in situ ne misuri tupugràfichi, è senza pianu di divisioni, vali à dì nantu a basa di u pianu cadastrali solu. Sta pussibilità, da veru menu custosa, ùn hè risirvata ch’à i tarreni chì ùn si poni custruiscia o senza accessu, è situati in zona non custruita, cù una anàlisi à u casu à casu da u giumetru-spertu. Di manera generali, stu prucedimentu hè scunsugliatu, chì custituiscia un mutivu di lìti da vena.
T’avemi un deuveri assulutu d’indipindenza è di neutralità. Quissa significheghja chè ùn prupunimi micca a cunfinata di limitera chì avantaghja l’una o l’altra di i partiti, ma quidda chì risorghji da a noscia anàlisi com’è essendu a bona. Ne più, nemmenu.
Com’è a dìcini i testi di a prufessioni, u giumetru-spertu « ùn pò impona u so puntu di vista, ma solu cunsiglià, prupona è cunvincia lealmenti, in u rispettu assulutu di i diritti leghjìtimi d’ognunu. »
In casu di fiascu di una limitera à bona à bona, hè pussìbuli di indirizzà si à u Tribunali Ghjudiziariu. À quidd’occasioni, un giumetru-spertu hè designatu da fà una pruposta di lìmita, quant’è in u casu di una limitera à bona à bona. Se u disaccordu c’hè sempri, hè u ghjùdici chì si prununcia nantu à a pusizioni di i lìmiti liticarini.
A limitera com’è a pratichemi hè detta à bona à bona. Quissa significheghja ch’è pudemi prupona una lìmita. Sò i partiti chì dicìdini di validà la o micca. Tandu, un prupietariu pò ricusà a lìmita prisintata. U fiascu di una limitera pò essa u risultatu d’altri caghjoni : un tarrenu chì i prupietarii ùn rispòndini micca à i dumandi, o sò impussìbuli à identificà par indettu. In u casu sìmulu ridattemi ciò ch’omu chjama un prucessu verbali di mancanza, chì discriva chjaramenti i caghjoni ch’ani impiditu di compia a limitera. Stu prucessu verbali di mancanza hè diffusu à i partiti cuncirnati. A più impignata pò tandu decida d’indirizzà si à u Tribunali Ghjudiziariu da chera una limitera ch’ùn sarà più à bona à bona, ma ghjudiziaria.
Da chì u giumetru-spertu possi ditarminà i lìmiti in ubbiittività, hè impurtanti ch’è vò li dèssiti una coppia di a voscia pezza d’identità è di u vosciu tìtulu di prupietà (chì pò cuntena infurmazioni di prima trinca nantu à i lìmiti di u vosciu tarrenu), è ancu tutti l’altri elementi chì vi pàrini pertinenti : pianu anzianu, cunvinzioni in attu privatu, currieru, etc… Da sapè ni di più, pudeti cunsultà u librettu d’infurmazioni editatu da l’Òrdini di Giumetri-Sperti.
Da nuttà, ch’eddu ùn hè nicissariu di dà ci un strattu o un rilevu cadastrali : L’avemi dighjà.
Una lìmita apparenti nantu u tarrenu hè ghjuridicamenti incerta. Una limitera sola rializata da un giumetru-spertu (o una limitera ghjudiziaria), matirializata o ricunnisciuta in situ è furmalizata da un pianu è un prucessu verbali di limitera signata da i prupietarii, pò guarantiscia definitivamenti una lìmita.
Soli casi particulari : certi lìmiti naturali, par indettu i fiumi è vadini (fora di u duminiali).
